გერმანიაში სასწავლებლად წასვლა 22 წლისამ გადავწყვიტე, ამ პერიოდში საქართველოში საკმაოდ რთული ეკონომიკურ-პოლიტიკური ვითარება იყო და ევროპაში განათლების მისაღებად წასვლა დიდი პრივილეგია იყო. ყოველივე ეს კარგად მქონდა გააზრებული, შესაბამისად ვაკეთებდი ჩემ მაქსიმუმს დასახული მიზნების მისაღწევად. სწავლის პარალელურად მიწევდა როგორც მუშაობა, ასევე სხვადასხვა პროგრამებისა და სტაჟირებების გავლა, რათა პროფესიულ ზრდასთან ერთად, ფინანსური უზრუნველყოფაც მქონოდა. ვფიქრობ, ცხოვრების ასეთი რიტმი ღირებულებების გადაფასების საშუალებას გვაძლევს და გვხდის კიდევ უფრო მიზანდასახულს. 2009 წელს დავამთავრე “University of Applied Sciences of Trier”-ის ბიზნეს ადმინისტრირების პროგრამა. მალევე დავიწყე საკონსულტაციო სფეროში მოღვაწეობა. ვმუშაობდი ისეთ კომპანიებში, როგორებიც არის: PwC, Rödl&Partner, con|energy Unternehmensberatung, c.con Management Beratung. საკონსულტაციო სფეროში მუშაობის პერიოდში, ვხელმძღვანელობდი მრავალ პროექტს, რომლის ფარგლებშიც გერმანიის, შვეიცარიისა და იტალიის კომპანიებს ვეხმარებოდი, როგორც ეფექტიანი ორგანიზაციული სტრუქტურის ჩამოყალიბებასა და საკვანძო ინდიკატორების (KPI), ასევე რისკის მენეჯმენტის სისტემების დანერგვაში. სწორედ ამ პერიოდში მივიღე გადაწყვეტილება დავბრუნებულიყავი საქარველოში და დაგროვილი ცოდნა გადამეცა ქართული კომპანიებისთვის.